ــــ(كلمه حلوه وكلمتين ...حلوه يابلدي)ــــ
أفتكر زمان وانا عيل كده كونت اقف اتفرج علي الاغنيه دي فيديو كليب وجسمي كله مقشعر كده وكله كل سنه كده والا بتاع كونت تلاقي التليفزيون في 6اكتوبر يفضل يشغلنا اغاني بقي مصر اليوم في عيد هييه مصر اليوم في عيد الله .... وطبعا انتا كطفل حفظتها بمرور السنوات .... اول حدث سياسي شوفت فيه الداخليه المصريه كانت ايام محمد الدره كونت تقريبا في اولي ثانوي مش فاكر المهم اللي حضر الايام دي يعرف ان محيط جامعه القاهره ايامها كانت عباره عن مصغر ليوم 28 يناير
ـــ(عارفه سوااااد العسل ...أهو ده اللي حالك ليه وصل.... ازاي قوليلي مكمله وكل دا فيكي حصل .... ليه الي جايلك أجنبي عارفه عليه تطبطي ....وتركبي الوش الخشب علي اللي منك تقلبي )ـــــ
الفتره دي سواد كلي كامل في حياه تلات اربع شباب البلد دي (وربنا جيل فقري ونحس) وطبعا عارفين من رفض اسلوب للتربيه من الاهل للتنسيق وبلاويه مخدرات مشاكل زواج الاكل كان ترف اصلا غير الاضطهاد وبالعني الحرفي من الشرطه لأي كائن إسمه مصري لدرجه اني في فتره شكيت انهم بيعملوا البطاقه عشان يعلمونا من الاجانب بس طار التفكير بسرعه احنا بنبان وش اصلا
ــــ(يا بلادي ....يابلادي ... أنا بحبك يا بلادي )ــــ
ظهرت الحاله دي بقي في فتره الثوره بالضبط بعد رجوع النت الي كان مقطوع وانتشرت واستمرت لحد بدايه يسقط حكم العسكر اللي هي كانت الشهر اللي بعدها تقريبا
ــــ(كان ديما فاشل في الثانويه ....يدوب جاب خمسين في الميه بالرشوه خلاص الباشا اتعلم وخد شهاده بميت كليه )ـــــ
ودي اعقبت الفتره السابقه لتكرر اعتداء الداخليه علي المتظاهرين من الثوره لحد شهر يوليو واعتصام 8-7 وظهرت معاها ـــ( مش ناسيين التحرير)ــــ كرد فعل استفزازي عشان فرق الذخيره وكده ودي كانت بتجننهم والتراس مشكورين كانوا في الوقت ده عامود صلب ومازلوا
ــــــ( يا بو دبوره ونسر وكاب ومباحث تنفيذ واداب ....إستجواب بكلاب وعذاب روح اخبط راسك في الباب )ــــ
ـــــ(رفعنا رسنا في السما والجوع مبقاش بيهمنا .... في كل شارع في بلادي صوت الحريه بينادي)ــــ
برغم التناقض بين جو الاتنين بس ده حالنا في الوقت ده تايهين بس سرعان ما ثبتت الاولي ما دخول شهر 5 وشهر 6
ـــ( ويكون جرئ ويكون شجاع مش إمعه وحته بتاع .... مطلوب دكر)ـــ
نداء بدا عشان التوهان ما يزيدش ومافيش حد جهلحد كتابه هذه السطور
ــــ(...× 0.....أه ه ه ه .... طاخ بوم تسسسسسس )ــــ
نشيد واغنيه استمروا من محمود محمود 1 :حتي مجلس الوزارء
ــــ( ساكتين ساكتين ومكملين .... بنوطي رسنا وعاملين مش شايفين )ــــــ
ــــــ( مطلوب منك السكوت تكون انسان بديل .... مطلوب تسكت تموت او تعيش اسير....عايش في اكبر سجن بس من جوايا حر حاضر هتعجب تكفي عني كل شر ... الولاء للماضي وافكار لينا صديقه ...كذب الكاذب جوايا بياكد الحقيقه ....انعكاس تاريخ الزيف في المرايا واضح .....طوبه تكسر المرايه للحقيقه فاضح ....مستورين من جوانا لو جسمنا اتكشف ....فرد ينطق بالحقيقه بالخيانه اتوصف ... انهزامي وإنهزم ....انتصاري اللي اتسرق.... الحقيقه فبركوها بحرن علي كتاب اتحرق
أنا اللي ماتوا من سنه واللي قاتل ما اتشنق .... انا السطور علي الورق .... انا اللي من جوه اتحرق .... انا اللي شعري شاب وهو طالب مدرسه ..... انا اللي ثانبت مهما قالوا ومهما زودوا الاسي .....إثبت مكانك )ـــــــ
..................................لآ تعليق
ذكريات كتيررررر افتكرتها وانا فيها من ساعه ماكونت بطنطط وانا عيل لحد ماشفت القمع بعيني ولحد مابقيت ضد نظام افسد وبيفسد عقول وهفضل ضده سواء كان ماسك كاس خمره وبيقولي في صحتك او ماسك مسدس وبيهددني بيه او ماسك سبحه وبيقولي قال الله تعالي وقال رسول الله طالما انتا ساكت علي فساد تبقي مشارك فيه ومشارك فيه انا هكون ضدك
وللحديث بقيه .....
يتبع.........
ليست هناك تعليقات:
إرسال تعليق